am11Fi 2:21m22Ko 5:15m3Ef 2:2-3, Ta 3:3m6Lo 6:23
bm7-9Lo 12:9-13m10-11Lo 12:6-8, 1Ko 12:4-7
cm14Md 5:11m14-161Fi 2:19-20m16Af 5:41m18Gah 11:31

1 Peter 4

KaꞋi Keliso kanadewaveꞋuꞋulena, au veꞋumagigi

kananuhagana.

1Tu waꞋita, Keliso wowone veꞋumagigi ginuhagana faꞋina omi meda Bana amine vita tulina tulina agaidiya wanahawahegemi. Hai kaliva wowone vita Keliso faꞋine ginuhagana, medema dewa koyona ahe givenikohiyena. 2Dewa koyona givenikohiyena faꞋina, tova adamoya be ginana alika ana maka gilubodana be hidei babiya keke tauna yana nuwanuwa itaꞋitaluvadigana againe ginamiyami, au Yaubada yana nuwanuwa againe ginamiyami. 3Badi Yaubada keke hidahalamaneni-ma dewa koyona tulina tulina agaidiya hihawahawahegedi amine, meda tuwaina omi wahawahegemi maꞋita lauva tunugina. Au amifata tu gihavaina. Dewai-dina ma nuwanuwa ayaꞋayafanina kadu itaꞋitaluvadigana agaidiya hivetalaiyedi, gufa laulaugina ana yu-faꞋila againe hivekwavakwava, vemwamwala kwavakwavana tulina tulina agaidiya higagakahikahi, balauma adi davadava againe, udo tulina tulina agaidiya hihawahegedi. 4Mena dewai-dina wavenikohiyedi be keke badi buye wadavekwavakwava faꞋina, nuwadi givegafoꞋuyaꞋuya kadu hivekabuꞋalaꞋalawemi. 5Tu tova mulina Yaubada matane hinamidi be yadi dewa faꞋina hinabonalaufata. Bana ana egana Tovedewayauga, ada badi aimo wayawaidi himimiyami kadu aliꞋalikadiyao yadi dewa ginalaufata. 6Gavana ana inuba badi ahe hiꞋalika-ma agaidiya VenuwaꞋata Yamumuna ana laumamala gina? Me badi tomiyababi faꞋina yadi dewa fatana hinuhagana higa alika. Wowodi giꞋalika nonogana VenuwaꞋata Yamumuna adifaiweya hivenogaleni-yo aluꞋaluwadiya wayawai-vagahidi hinamiyami Yaubada gimiyamiya-vagata amine. a

Yaubada yana abavetala againe tobohiyadeyao

kanavelugadi.

7KaduꞋe ganagahe. Gaitoma moyaꞋaina adi abalauyabu giluvedaꞋufo. Medema faꞋina wananuwanuwa-hagihagi kadu taumiyao wanahawatami be higa amifaiweya veꞋoꞋola againe wanahawahegemi. 8Gaitoma saꞋeyana giluboda-moꞋemi higa buye wanaveꞋahawahawahega lakahina, faꞋina yami nuwanuwa hawahawahegana againe tobohiyamiyao yadi koyona amifaiweya wanaluluvetavetauna. 9Keke yami wanuwalolona au yami waꞋasehawahega tobohiyamiyao wanaluveꞋauyedi kadu badi hinaluveꞋauyemi. 10Yaubada yana nuwadoga againe AluꞋaluwa Mahalina yana abavetala tulina tulina omi saꞋeyana saꞋeyana givelemi-yo Bana faꞋine wafifaisewa. WanaꞋidibumuhigena be mene ami gava vehimeya Bana givelemi amine buye wanaveꞋaveluveluga. 11WaꞋita, kaꞋi tobohiyamiyao adi veluga faꞋina yana abavetala agaimiya lauꞋage amine, au gilubodami be wanalulauꞋage higa vaita Yaubada bona-moꞋena wadayakayakahini. KaꞋi yana abavetala higa ami vehimeya givelemi vaita igibagiba amine, au gilubodami be Yaubada ginafaiwalavelemi amine yami igibagiba agaidiya tobohiyamiyao wanaveluvelugadi. Hidede amine wanafifaisewa be higa Yesu Keliso yana veluga faꞋina yami dewa matatabuna agaidiya Yaubada ana egana wanakilakahina. Bana yana kaiwabu kadu yana faiwala ginaduva-vagata tova inaga inaga keke ana abalauyabu. Ehe hidedemi. b

Omi Keliso yana kaliva faꞋina, veꞋumagigi

wananuhagana.

12TobohiyaꞋaseꞋasekweyao, tova adamoya vita lakahi-moꞋena waꞋayaunena vaita ai gidaꞋalahimi amine. Medema faꞋina keke wanayaulowoga vaita gava vita wadanuhagani. 13Au Keliso vita lakahina giwahina amine omi wawahina faꞋina wanavemwamwala be higa yana yewaꞋela ana toveya yana kaiwabu ana ivemogatala againe wanavemwamwala-moꞋa. 14KaꞋi omi Keliso yana kaliva yana vevine faꞋina hinavekabuꞋalaꞋalawemi amine o yami vemwamwala gavatubuga! FaꞋina Yaubada AluꞋaluwana kikaiwabuna gimiyamiyatagomi. 15KaꞋi waluveꞋalika, o kaꞋi wakaiꞋafu, o mali kaliva ana mataꞋatuboda wasebodana, o kadu tamo dewa koyona velugana faꞋina vita wanuhagana, au taumiyao ami vita. Ada dewai-dina keke-moꞋa gidalubodami. 16Atu kaꞋi omi Keliso yana kaliva faꞋina vita wanuhagana, keke wanawowomumu, au Keliso ana egana wawahina faꞋina Yaubada wanahawadavadavana. 17Tova ahe giyemu be Yaubada kaliva ginavedewayaugida be ada laufata ginaveleda. Givebutu ide yana yoꞋogaga gimidivedewayaugida be higa yada nuwanuwa koyodi ginahavaina. Ide agaideya givebutu tu aimo ginanunauwena be badi Yaubada yana VenuwaꞋata Yamumuna keke hidavenogaleni amanadi ginavedewayaugidi. KaꞋi yana vedewayauga ide tovenogala agaideya givebutu be vita kaꞋayaunena, au badi keke hidavenogala-ma aimo ginavedewayaugidi ana toveya adi vita gavatubuga! 18Meda gahe saꞋeyana Veyao Tuwaina ana bukiya gidadauda gigayo,

Kaliva yegayegadiyao vita lakahina hiwahi-yo adi
kibababala hinanuhagana. Au gavaimi be tokoyona
kadu badi Yaubada ana tovekwaulauga
kibababala hidanuhagani?
 19Yaku gahe dobona hidede amine.

Gaveyao vita tulina tulina hinuhagana Yaubada yana nuwanuwa amine, medema gilubodadi be dewa hagihagina againe hinaꞋatuvefaꞋila, ada aluꞋaluwadi adi ToꞋaibubuna nimane hinasena be Bana ginaꞋitaveꞋavidi ahe giwonadabadaba amine. c
Copyright information for VIV